Tiago Sanches da Gama

L Núcleo de l Sporting Clube de Pertual de Miranda de l Douro nace de la gana i de l afinco dun juntouro de lhioneses mirandeses que arrefucírun las mangas i trabalhórun para tornar berdadeiro este suonho antigo, l de poderen tener un lhugar solo pa la família lhionesa. Deste grupo lomeio a Didie Pires i a Luís Delgado; sien eilhes este suonho nunca se habie feito. Ye cun muita proua i cun muita paixon que tenemos un sítio abierto na cidade más ouriental de Pertual, mesmo al pie de la raia, adonde se puode mirar a caras a Spanha. Somos l único núcleo adonde se fálan dues lhénguas oufeciales de la nuossa naçon: l mirandés i l pertués. Tenemos un spácio honrado que abre las puortas ne ls dies de fiesta i quando hai jogos, que amostra bien la proua an ser Mirandés i an ser de l Sporting.